Hvað á hundurinn minn að borða mikið á dag?

Hvað á hundurinn minn eiginlega að fá mikið að borða er ein algengasta spurning hundaeigenda. Svarið virðist einfalt, þ.e. skoða þyngd hundsins og fylgja töflunni á fóðurpokanum. En raunveruleg fóðurþörf hunda er einstaklingsbundin og ræðst af mun fleiri þáttum en þyngdinni einni saman.

Tveir hundar sem báðir eru 20 kg geta til dæmis haft töluvert ólíka orkuþörf. Annar gæti verið ungur og virkur hundur sem hreyfir sig mikið á hverjum degi á meðan hinn er eldri, rólegur heimilishundur sem fer aðallega í rólegar gönguferðir.

Þess vegna er best að líta á ráðlagðan dagskammt sem góðan upphafspunkt en ekki nákvæma reglu sem gildir um alla hunda.

Þyngdin er aðeins hluti af myndinni

Flest hundafóður er með fóðrunarleiðbeiningum þar sem ráðlagður dagskammtur miðast við þyngd hundsins. Slíkar upplýsingar eru gagnlegar þegar ákveða á upphaflegan skammt. Þyngdin ein og sér segir þó ekki alla söguna.

Orkuþörf hundsins getur meðal annars ráðist af:

• aldri
• stærð og líkamsbyggingu
• hreyfingu og virkni
• holdafari
• hvort hundurinn sé geldur
• lífsstigi
• umhverfi og hitastigi
• almennu heilsufari

Rannsóknir og næringarleiðbeiningar sýna jafnframt að töluverður einstaklingsmunur getur verið á orkuþörf hunda af sömu þyngd. Þess vegna þarf alltaf að fylgjast með hundinum sjálfum og aðlaga skammtinn eftir þörfum.

FEDIAF, samtök evrópska gæludýrafóðuriðnaðarins, gera einmitt ráð fyrir mismunandi orkuþörf eftir virkni. Hundur sem fær minna en klukkustund af léttri hreyfingu á dag getur haft töluvert minni orkuþörf en hundur sem hreyfir sig í nokkrar klukkustundir á dag.

Þetta er ein ástæða þess að mikilvægt er að velja ekki aðeins rétt magn heldur einnig fóður sem hæfir lífsstíl hundsins.

Aldurinn skiptir líka máli

Næringarþörf hundsins breytist í gegnum lífið.

Hvolpar eru að vaxa og þurfa hlutfallslega meiri orku en fullorðnir hundar. Þeir þurfa jafnframt fóður sem er sérstaklega samsett með vöxt og þroska í huga.

Þegar hundurinn verður fullorðinn breytist orkuþörfin og síðar á ævinni getur hún breyst aftur. Eldri hundur sem hreyfir sig minna getur til dæmis þurft færri hitaeiningar en hann gerði á sínum virkustu árum.

Hvernig veit ég hvort skammturinn sé réttur?

Vigtin er gagnleg, en holdafar hundsins segir oft meira en talan á vigtinni ein og sér.

Hjá hundi í góðu holdafari ættir þú almennt að geta fundið fyrir rifbeinunum án þess að þurfa að þrýsta mikið. Þegar horft er ofan á hundinn ætti einnig að vera hægt að greina mitti fyrir aftan rifbeinin.

Ef rifbeinin verða sífellt erfiðari að finna og mittið hverfur getur það verið vísbending um að hundurinn sé að fá meiri orku en hann notar.

Ef hundurinn léttist hins vegar óvænt eða verður of grannur getur þurft að auka skammtinn eða skoða aðrar mögulegar ástæður.

WSAVA leggur einmitt áherslu á að meta bæði þyngd og holdafar þegar næringarþörf hunda er metin.

Ekki gleyma namminu

Það er auðvelt að mæla dagskammtinn vandlega í skálina en gleyma síðan öllu öðru sem hundurinn fær yfir daginn.

Nammibitar við þjálfun, matarafgangar og annað aukafóður inniheldur líka orku.

Ef hundurinn fær mikið af slíku getur heildarorkuinntakan orðið töluvert meiri en dagskammturinn á fóðurpokanum gefur til kynna. Sem almenn viðmiðun ætti nammi og annað aukafóður ekki að vera meira en um 10% af daglegri orkuinntöku hundsins.

Ef mikið er æft með hundinum getur til dæmis verið sniðugt að taka hluta af daglegum fóðurskammti frá og nota sem verðlaun yfir daginn.

Ætti ég að vigta fóðrið?

Það getur verið mjög gagnlegt, sérstaklega ef hundurinn þarf að léttast eða halda ákveðinni þyngd.

„Einn bolli“ eða „ein skál“ getur nefnilega verið mjög ónákvæm mælieining. Með einfaldri eldhúsvog er auðvelt að sjá nákvæmlega hversu mörg grömm hundurinn fær á dag.

Það auðveldar líka að gera litlar breytingar.

Ef hundurinn er til dæmis smám saman að þyngjast er mun auðveldara að breyta skammtinum úr 250 grömmum í 230 grömm en að reyna að gefa „örlítið minna í skálina“.

Byrjaðu á leiðbeiningunum og fylgstu síðan með hundinum

Fóðrunartaflan á umbúðunum er góður staður til að byrja á. Hún gefur þér viðmið út frá þyngd hundsins og því fóðri sem þú ert að nota.

Þaðan ætti að fylgjast með; þyngd, holdafari, virkni, aldri og lífsstíl.

Ef hundurinn heldur góðu holdafari, er orkumikill og líður vel er skammturinn líklega nálægt því að vera réttur. Ef hann byrjar að þyngjast eða léttast getur þurft að aðlaga magnið.

Fóðrunarleiðbeiningar eru enda almenn viðmið og mælt er með því að fylgjast reglulega með þyngd og holdafari til að koma í veg fyrir of- eða vanfóðrun.

Rétt magn af réttu fóðri

Notaðu ráðlagðan dagskammt á umbúðunum sem upphafspunkt, fylgstu með holdafari hundsins og aðlagaðu magnið eftir þörfum. Ef miklar eða óvæntar breytingar verða á þyngd, matarlyst eða holdafari er hins vegar rétt að leita ráðgjafar hjá dýralækni.